Zarjadniski zwjazk-Verwaltungsverband
 
 
Folklorny festiwal-Folklorefestival
 
 
TCM
 
 
Lausitz.de
 
 
Oberlausitz.com
 
 
Starownja-Altersheim
 
Wuběr rěčow:

Kultura w Chrósćicach

W Chrósćicach njeje jenož serbska rěč žiwa ale tež serbska kultura.
Tak pěstuja so we wsy wšelake serbske nałožki.

25. januarja swjeći so po cyłej Łužicy ptači kwas. To je stary serbski nałožk, na kotrymž so ptački wosebje dźěćom za picowanje w zymje dźakuja. Tak dóstanu wot nich, hdyž taler na wokno staja słódne pječene ptaki darjene.
Wosebje w pěstowarni a w zakładnej šuli so tutón serbski nałožk pěstuje. Tu zwoblěkaja so dźěći serbsku kwasnu drastu a ćahnu jako kwasna hosćina po wsy do "Jednoty", zo bychu staršim a přiwuznym rjany ptačokwasny program předstajili.
Tež serbski ludowy ansambl z Budyšina so profesionelnje kóždolětnje z ptačokwasnym programom dźěćom a tež dorosćenym w Chrósćicach prezentuje.

Na dnju swjateje Wałpory, 30. apryla, je pola nas chodojtypalenje. Potym, zo je wjesna młodźina na nawsy meju stajiła, wotpali so na łuce při pomniku wulka hromada hałuzow. To je stary pohanski nałožk, z kotrymž su naši prjedownicy zymu wuhnać chcyli. 

W meji naša młodźina kóždolětnje mejemjetanje organizuje. Młodźi pacholjo běža wo wjeršk meje napřemo a młodźenc, kotryž bě najspěšniši je mejski kral a wuzwoli sej z holcow, zwoblěkanych w narodnej drasće, swoju mejsku kralownu. Tak ćahnu, přewodźane z pachołom z mejku na konju a z dujerskej kapału, na nawjes a zarejuja lóštne serbske stučki.
Zakładna šula a pěstowarnja swójske mejemjetanje přewjedźetej.

Na swjateho Měrćina, 11.11., chodźa dźěći po wsy a Měrćina spěwaja: "Wjele zboža přejemy a so pěknje prašamy, njej tu swjaty Měrćin był, njej tu ničo wostajił?". Swjaty Měrćin je wězo něšto tu wostajił a dźěći dóstanu słódkosće abo sad.        
Nawječor ćahnu zhromadnje z swjatym Měrćinom na konju wot kapałki hač k cyrkwi w lampionowym ćahu. W cyrkwi swjeći so mały nyšpor z krótkim předstajenjom wo žiwjenju a skutkowanju swjateho Měrćina.

Serbska kultura je pola nas kruće ze serbskej rěču zwjazana. Pěstowanje serbskeje kultury je za zdźerženje serbskeje rěče wažny měznik a bjez serbskeje rěče by našej kulturje žro pobrachowało.
Nadźijomnje dźensniša młodźina w Chrósćicach tež konsekwentnje serbsku rěč dale da, zo bychu přichodne generacije w Chrósćicach awtentisku serbsku kulturu měli.  

Impressum und Datenschutz | Impresum a škit datow