Zarjadniski zwjazk-Verwaltungsverband
 
 
Folklorny festiwal-Folklorefestival
 
 
TCM
 
 
Lausitz.de
 
 
Oberlausitz.com
 
 
Starownja-Altersheim
 

Jutry w Chrósćicach

Jutry w katolskich Serbach dyrbiš dožiwić.
Maš zaćišć, zo je tu wšón lud a kraj jutrowny. Radostne haleluja njeklinči jenož w Božich słužbach w cyrkwi, ale tež w zjawnosći. 

Na spočatku křižerskeho procesiona njesu křiž, postawu zrowastanjeneho a cyrkwinske chorhoje. Měšnik přepoda nawodej křižerskeho procesiona při cyrkwi božu martru a přeje bože žohnowanje: "Wozjewće radostne poselstwo wo Chrystusu, zrowastanjenym wšemu swětej! Jěchajće w božim mjenje!"  

W jutrownej nocy abo jutrońčku rano wobdźěleja so křižerjo na swjatočnych kemšach. Nowačkojo dóstanu zelene wěnčki, jubilarojo slěborne abo złote znamješka požohnowane. Potom sydnu so w čornej sukni a z cylindrom na wudebjene a zesedłane konje. Po puću mužojo we wjeskach kěrluše spěwaja a zwonka wjeskow modla so róžowc a litanije.

Hdźe su korjenje tohole nałožka? Často so na předkřesćanski pochad z nalětnjeho jěchanja wokoło polow pokaza.
Hižo do reformacije běchu tajke jutrowne procesiony wšudźe w Srjedźnej Europje znate. Z křižnymi wuprawami mjez 11. a 13. lětstotkom pak nimaja ničo zhromadneho.
Po Lutherowej reformaciji zdźerža so jutrowne jěchanje jeničce w zbywacych katolskich wosadach.
W 18. lětstotku so rozswětlerstwo w tym zmysle wuskutkowa, zo chcychu biskopja a klóštry někotrežkuli stare nałožki wotstronić, wudawajo modernizowanje cyrkwje. Abatisa klóštra Marijinej hwězdy drje je Chróšćanskemu fararjej kazała, zo by z klětki wozjewił zakaz křižerskeho procesiona a zo njesmě farske chorhoje z cyrkwje dać. Mužojo wobstarachu sej sami wićežne chorhoje a jěchachu dale. Tohodla ma Chróšćanski procesion dźensa hišće dwoje chorhoje.
Samo w času nacionalsocializma a w poslednich wójnskich dnjach 1945 su serbscy křižerjo jěchali. Tehdy drje wobsteješe přikaz, serbske Bože słužby a procesiony přeněmčić a počasu wotstronić. To nastupaše tež křižerstwo.
Pospyty, tele jutrowne wěrywuznaće Serbow powróćić, wostachu pak bjez wuspěcha.

"Směmy z połnym prawom rjec, zo so w našim ludźe jutry jako wjeršk cyrkwineho lěta swjeća a zo je jutrowne poselstwo zakład našeho žiwjenja. Jutry činja z našeho žiwjenja jenički swjedźen" (z prědowanja fararja Cl. Hrjehorja)

Impressum und Datenschutz | Impresum a škit datow