Zarjadniski zwjazk-Verwaltungsverband
 
 
Folklorny festiwal-Folklorefestival
 
 
TCM
 
 
Lausitz.de
 
 
Oberlausitz.com
 
 
Starownja-Altersheim
 

Ze spotowej chroniki

 

1896 so kolesowarske towarstwo "Serbowka" jako najstarše sportowe towarstwo w Chrósćicach naspomni.

1924 Wučer Pjetaš załoži w tutym lěće towarstwo "Sokoł" Chrósćicy, hdźež so hłownje čeladni, dźěłaćerjo a małoburja organizowachu. 

1931 Swjatočne poswjećenje sokołskeje chorhoje. Chorhoj, w serbskich barbach módra-čerwjena-běła, měješe nimo sokoła prědku napisane "Sokoł w Khrósćicach 1931" a zady "Serbow chcu škitać, dónž dźeń budźe switać". Chróšćan Jan Kmjeć je chorhoj hač do wosomdźesatych lět doma wobchował.
W nowinje "Sokołske listy" so naspomni, zo je so w sokołskich jednotkach  Kamjenskeje wokoliny nimo ćěłozwučowanja tež kopańca hrała.

1931 so potajkim móže jako lěto załoženja Chróšćanskeje kopańcy wopotstatnić. Prěnje koparske mustwo hraješe najprjedy pod mjenom "Segelflugverein", pozdźišo pak "Sokoł" Chrósćicy.

Pusćina "Sahara", kónc zapusćeneje krajiny mjez Šibjeńcu a Hórkami běše za koparjow krótki čas hrajnišćo.

1933-1936 Sokołske hibanje so pod nacionalsocialistami zakaza a tuž Chróšćenjo pod mjenom "DJK-Deutsche Jugendkraft" dale kopańcu hrajachu. 

Jutrownu póndźelu 1934 móžachu koparjo prěni raz na tak mjenowanym sportnišću při šuli hrać, tule ležownosć jim Chróšćan farar k dispoziciji staji.
Prěnja hra mjez DJK Chrósćicy - DJK Radwor skónči so z 2:2.
Na Bože spěćo bu sportnišćo swjatočnje přepodate.

1939-1945 so tež DJK zakaza, potom so sportowe hibanje hač kónc wójny 1945 rozpušći.

1946-1950 Sportowa jednotka Chrósćicy je jedna z prěnich, kotraž je kopańcu wozhrodźiła. Sportnišćo při šuli so powjetši a wuruna, a koparjo hrajachu pod mjenom  "Sonja". Prawidłowne přećelske hry napřećo wubrance studentow so wotměchu. Někotři z hrajerjow Chróšćan mustwa, kotrež mějachu móžnosć hižo w jatbje kopańcu hrać, běchu wosebje wušikni. Tute talenty přinjesechu Chróšćanam wulku nahladnosć. Z wšelakich přičin pak so jednotka "Sonja" 1951 rozpušći.

1951-1953 ke kermuši 1951 so zaso w Chrósćicach kopańca hraješe. Nowe mustwo mjenowaše so "Traktor" a docpě w prěnjej hrě napřećo Kamjencej jedne naspomnjenja hódne 0:0. Nawoda sekcije kopańca bě rěznik Pawoł Grubert, ale tež tute mustwo hraješe jenož přez lěto aktiwnje. 

Hakle 1955 so kopańca pod nawodom wučerja Rudija Benady zaso do žiwjenja zwoła a z mustwowym přewodnikom Janom Kusom z Łušča přińdźechu Chróšćenjo zaso hač do 2. wokrjesneje ligi.

Wot lěta 1957 wjedźeštej mustwo koparjow Jurij Dučman jako nawoda sekcije a Gerat Pöpel jako mustwowy nawoda.

Dokelž njedosahaše ličba hrajerjow přińdźe 1961 k zjednoćenju z koparskim mustwom Pančicy - mjenowachu so sportowa jednotka "Traktor" Pančicy/Chrósćicy. Po jednym hrajnym lěće w 2. klasowej lize docpěchu postup do 1. wokrjesneje ligi.  

1965/66 Po dobrym přihotowanju hrajneho lěta docpěchu hrajerjo 4. městno 1. wokrjesneje ligi. Hry wotměchu so lětnje wotměnjejo jónu w Pančicach a jónu w Chrósćicach.

1969/70 pak njebě zaso hrajerjow dosć, młodźi ludźo počachu pobrachować. Za dypkowe hry njemějachu dosć wuměny za hrajerjow a prawidłowne zwučowanja tež njeběchu móžne. Tak přińdźe k wotstupej z 1. wokrjesneje ligi a z lětom 1971/72 mjenowaše so mustwo jenož hišće " Traktor Pančicy". 

1971/75 wutwori so pod nawodom knjeza Ruprechta z Časec w Chrósćicach jedne "Stare knjezowe" mustwo, kotrež prawidłownje přećelske hry hraješe.

23. apryla 1981 zetkachu so w Krawčikec hosćencu 17 młodostnych a zwuraznichu zhromadnu wolu, w Chrósćicach zaso kopańcu hrać.

Na załožerskej zhromadźiznje, 4. meje 1981 zwołachu so tři sekcije SJ Chrósćicy do žiwjenja, sekcija kopańca, sekcija blidotenis a sekcija žónskeje gymnastiki.
Jako předsydstwo wuzwoli so:
-Předsyda - Jurij Cyž
-Městopředsyda - Jan Dornik
-Pokładnik - Jurij Mark
-Zapisar - Jan Macka
-Nawoda sekcije kopańca - Křesćan Šnajder
-Nawoda sekcije blidotenis - Měrćin Ričel
-Nawoda sekcije žónska gymnastika - Angelika Bjedrichowa
Kopańca hraješe so na hubjenym sportnišću při šuli. Blidotenis a žónska gymnastika přewjedźeštej so na Wjenkec/Krawčikec žurli.

1981/82 Chróšćan koparske mustwo pod nawodom Jana Macki startowaše na 1. městnje 2. wokrjesneje ligi z 56:4 dypkami a 116:24 wrotami. Postup do 1. wokrjesneje ligi bě docpěte.
Tež blidotenisowe mustwo sej samsny postup pod nawodom Měrćina Ričla wudoby. 

1983 započachu so pod nawodom wjesnjanosty Franca Młynka dźěła za powjetšenje a ponowjenje sportnišća při šuli. Nastać dyrbjachu tež běžnja čara a městnosć za dalokoskok.

Nošer čerwjeno-běłeje chorhoje sportoweje jednotki, kotraž so 28. julija 1983 poswjeći, bě Achim Hoyer z Chrósćic.

1984 nastachu prěnje přećelske styki z NSK "Start" Namysłow z Pólskeje. Přećelska hra w Namysłowje skónči so z 2:1.

Wot 14. do 17. awgusta 1986 přewjedźe so sportowy swjedźeń. Po třilětnym přetwarje sportnišća při šuli přepoda so zjawnosći swjatočnje nowe zelene hrajnišćo 105x67,5 m, twjerde hrajnišćo 60x40 m, 100m běžnja čara a městnosć za dalokoskok.
Wosebite zasłužby na twarje sportnišća maja wjesnjanosta Franc Młynk, Jurij Cyž, Jan Macka a Měrćin Škoda, kotřiž dobrowólnje wokoło 4000 hodźin na twarje pomhachu. 

W času přewróta 1990 buchu přez Jana Rjelku za sportowe towarstwo nowe wustawki wudźěłane. SJ Chrósćicy bu jako towarstwo "SJ Chrósćicy 1981 z. t." pola sudnistwa w Kamjencu zapisane.

1993 planowanje a započatk nowotwara zakładneje šule a wjacezaměroweje hale w Chrósćicach - zakładny kamjeń połoži so 4.12.1993.

18. junija 1994 załoži so žónske koparske mustwo. Wotewrjenska hra napřećo Ralbičankam přewjedźe so na wjesnym swjedźenju w Chrósćicach.

1995 Swjatočne přepodaće zakładneje šule a wjacezaměroweje hale dnja 3.6.1995 ludnosći.

Na swjedźenju k 770lětnemu wobstaću wjeski Chrósćic, dnja 13.8.1995 wobdźěli so tež sportowa jednotka Chrósćicy aktiwnje w swjedźenskim ćahu. Přihladowarjam pokaza so wuwiće sporta wot jeho spočatkow do dźensnišeho. Stara garda njeseše sokołsku chorhoj a młodźi sportowcy běło-čerwjenu chorhoj.

1996 bu Maćij Brycka jako prezident do sportoweje jednotki woleny. Přez jeho iniciatiwu připrawichu so mjez hrajnišćom a sportowej halu bul łójace saki w dołhosći někak 70 m. Tež wabjenske plakaty so na tutym městnje pod sakom připrawichu.

1997/98- W tutym času wobsteja w Chrósćicach 1. a 2. mustwo, jedne žónske mustwo, jedne hólče a dźěćace mustwo. Žónske hrachu prěnje dypkowe hry.

1998 přepoda so małe twjerde hrajnišćo ze swětłomjetakami šulskemu a towarstwowemu sportej přez wjesnjanostu Pětra Šołtu. Na kóncu lěta přepoda so tež nowa předrasćernja a rum za graty.

1999 gmejna Chrósćicy z wjesnymi dźělemi Hórki, Nuknica, Prawoćicy, Kopšin a Kozarcy wobsedźa rjane sportnišća

-Chrósćicy - jedne zelene hrajnišćo, jedne małe twjerde hrajnišćo, wjacezaměrowa hala

-Hórki - jedne zelene hrajnišćo, jedne twjerde hrajnišćo a za wólny čas
jewišćo, přebywarnje a předawarnje

W meji 1999 bu nowe předsydstwo wolene

W meji 2004 wotměješe so sportowy swjedźeń składnostnje 70lětneho wobstaća sportnišća při šuli.
Přećelska hra mjez SJ Chrósćicy a SJ Radwor skónči so z 3:2.

Nowe swětłomjetaki při sportnišću natwarichu so w oktobrje 2005 na iniciatiwu prezidenty Jurja Špitanka a trenarja Tomaša Paški.

2006 - na TCM-turněrje doby SJ Chrósćicy prěni króć pućowanski pokal před mustwami SV Klóšter Marijina Hwězda, SJ Njebjelčicy a DJK "Sokoł" Ralbicy/Hórki.    

W februarje 2008 bu nowe předsydstwo wolene

Impressum und Datenschutz | Impresum a škit datow