1657

Wjesne mjeno Horcka (horka, staroserbsce gorka = mała hora)

1703

W Hórkach su wosomnaće domow z katolikami a protestantami.

1777

Socialne rozrjadowanje drastoweje kónčiny wopřija 5 burow, 14 zahrodnikow a 14 chěžkarjow.

1778

Za twar Róžeńčanskej cyrkwje bu za fundament mjez druhim tež kamjeń z Hórkow předźěłany.

1812

W Hórkach započinaše so systematiske wudobywanje kamjenja, tam bu swětły drobnozornaty granodiorit łamany.

1839

W februaru bu za gmejnske wólby z pisanjom Hórčanskeje gmejnskeje knihi započane.

1871

Ke Chróšćanskej wosadźe słušeja wjace hač třitysac katolikow, z toho bydla mnozy we wsach wosady. Někotři wosadni bydla tež w ewangelskich wsach wokoliny. W Hórkach samych su to nimale dwěsćě katolikow.

1884

W Hórkach bydli před dwěsćě wosobow z jara wysokim podźělom Serbow.

1900

Hač do lěta 1900 běchu to bjezwuwzaćnje Serbja, kotřiž w skale dźěłachu. Mjez nimi běchu tež mnozy młodostni z Hórkow a wokolnych wsow, kotřiž tute ćežke ćělne dźěło jako kamjenjełamar wukonjachu.

1901

Knjez Korla Halbach kupi wot Worklečanskeho ryćerkubła pódu, lěsy, haty a předewšěm horu (dźensnišu skału). Knjez Halbach bě wučeny kowar a móžeše tuž swojim dźěłaćerjam fachowe pokiwy dawać. Poněčim wušaltowaše wón wšitkich konkurentow, předewšěm wěsteho knjeza Lebzu z Nuknicy. Wottransport k twarnišćam a na dwórnišćo do Njeswačidła wuwjedźe hłownje bur Młynk z Hórkow ze swojimi konjacymi zapřahami.

1906

W awgusće bu Hórčanska wohnjowa wobora załožena.

1910

W januarje bu puć mjez Dobrošicami a Hórkami twarjeny.

Bu wobzamknjene, gmejnsku studnju nic zasypać, ale ju wot při dróze bydlacych wužiwać dać.

Komisijowy puć Worklecy ‒ Hórki ma so wuplestrować.

1912

Ličenje skotu wot decembra pokaza konje, howjada, swinje, kozy, pjeriznu a kołće.

1915

Carl Halbach staji próstwu wo twar železniskeje čary k transportowanju kamjenjow. Dokelž měješe čara přez gmejnsku łučinu wjesć, bu próstwa wot gmejnskeje rady wotpokazana.

Srjedź prěnjeje swětoweje wójny natwari Halbach prěni wulki metalowy kran w skale.

1919

Wón da sej při puću z Worklec do Hórkow wilu natwarić.

1926

Přistup ke Krajnemu zwjazkej sakskich gmejnow nic powołanskich wjesnjanostow bu schwaleny a nowy wjesny zakoń bu přiwzaty.

Wobzamknjene bu nowošotrowanje komunikaciskeho puća z Hórkow do Jaseńcy na pjećstow metrach dołhosće.

1927

Próstwa wo elektriske wjesne wobswětlenje bu přizwolena, k financowanju ma so něšto drjewa na horje předać.

1928

Wěstotne tafle za motorizowany wobchad buchu skazane a nastajene.

Bu wobzamknjene, zo matej so zbytk Chróšćanskeho puća hač k pjekarni a potom puć do Jaseńcy wobnowić.

1930

Puć wot skałow do Worklec so z šotrom wobnowi.

Dokelž ma so šula w Chrósćicach rozšěrić, mysli gmejna Hórki na to, nětko swójsku šulu twarić.

Bu wobzamknjene, klětu w Hórkach nowu šulu twarić, sewjernje wsy, zo móža so Dobrošenjo přizamknyć. Twarnišćo kaž tež wjetši dźěl twarskeho materiala su hižo tu.

Po ludowym ličenju w tutym lěće bydli tu 222 wobydlerjow.

1933

Hižo lěta běža přihoty našich wobydlerjow, wojakam swětoweje wójny hódny pomnik stajić. Lětsa twori kamjenjećesar z Kamjenca z pěskowca wojaka čłowječeje wulkosće. Wón steji na krutym spódku ze zornowca.

1950

Reaktiwěruje so hašenski hat, kotryž bu přez wotćisnjenje bomby zničeny.

1951

W juniju bu sportowe towarstwo załožene.

1955

Podźěl Serbow wučini 89,2 %.

Přehlad nošerkow narodneje drasty:

cyłkownje: 70

‒        pod 24 lět: 1

‒        najmłódša nošerka: 20

‒        najstarša nošerka: 79

W tutym lěće bu wot Hórčanow nowe sportnišćo twarjene.

1960

W tutym lěće załožichu burja ratarske prodrustwo typ I "Při kamjenju".

Něhdźe w tutym času bu wjes do sewjera wo nowe připrawy bytostne rozšěrjena. K tomu liča stadion a wjacezaměrowe twarjenje z hosćencom, přenocowanskimi móžnosćemi a kehelnišćom.

1963

Poswjećenje sportoweho domu a symboliske přepodaće kluča přez předsydu Rady wokrjesa Kamjenc.

1965

W juliju jědźeše štyrceći ludźi ličaca serbska sportowa delegacija z Hórkow do susodneje Čěskeje republiki.

1968

Hač do kónca šěsćdźesatych lět měješe wjes Hórki jednoho priwatneho pjekarja Nowaka.

1970

Skała firmy Halbach přeńdźe do VEB Łužiski zornowc Zemicy-Tumicy.

1972

Ratarske prodrustwo typ I zjednoći so z třomi druhimi ratarskimi prodrustwami k ratarskemu prodrustwu typ III "Kamjentny hat" Hórki.

1973

W połstatych lětach wotsteješe w Chrósćicach hižo wukonosylna LPG typ III. Rólnistwowe wotrjady Pěskecy, Nuknica a Chrósćicy zjednoćichu so ke kooperatiwnemu wotrjadej rostlinska produkcija „Sorabija“ Chrósćicy. Rólnistwowe wotrjady Hórki a Ralbicy zjednoćichu so ke kooperatiwnemu wotrjadej rostlinska produkcija „Sorabija“ Chrósćicy.

1974

Přez zjednoćenje wsow Hórki, Prawoćicy, Nuknica, Kopšin a Kozarcy do wulkogmejny Chrósćicy rozšěri so teritorij gmejny.

1975

Zjednoći so sportowe zjednoćenstwo BSG Traktor Ralbicy a SJ Hórki.

1976

Twari so předawanišćo za Konsumowe drustwo na nawsy.

1977

Ratarske prodrustwo typ III Hórkow je so w tutym lěće ratarskemu prodrustwu (skótna produkcija) Pěskecy přizamknyło.

1980

Zestatnjena skała "Halbach" zastaji swoje łamanske dźěła (něhdźe štyrceći dźěłaćerjow).

1983

Poslednje hłuboke a šěroke wudobywanišćo bu zawrjene. Najwjace skałarjo namaka w skale pola Miłoćic nowe dźěłowe městno.

1985

W tutym lěće bu pod nawodom wobwodneho hladarja zemskich pomnikow wot spadnjenja wohrožena mohila sewjerowuchodnje Hórkow zdźěla wuryta. Dokelž bě při kromje pěskoweje jamy ležacy row hižo k třećinje wotłamany, dyrbješe so archeologiska situacija z nuznym dochowanjom wujasnić. Pod trawnikom na kamjenjach ležeše prěnja woršta črjopow. Najskerje su na hórce jónu woporne sudobja stali. W mócnym kamjentnym twarje běchu mało črjopow a popjeła ćěłow. Pod dźělom hórki bě jedna z drjewowym wuhlom překisana palna woršta. Tu bu pozdatnje k česći zemrěteho symboliske palenje přewjedźene.

W tutym lěće buchu we wsach Chrósćicy, Hórki a Kozarcy hašenske haty rekonstruowane abo nowe natwarjene.

1987

305 buchu ličene

1989

Dotwarjenje trafostacije w našej wsy su stawizny.

1990

Mnoho domjacnosćow ma lědma wody a dyrbi ju ze sudami domoj transportować.

W tutym lěće bu wjesne wobswětlenje přez firmu Jakubaš we wšěch wjesnych dźělach do porjadka stajene.

1991

W juliju wopyta načolny politikar a ministerski prezident Schleswigsko-Holsteinskeje našu wjes.

1992

W januarje wobzamkny gmejna z dwěmaj hłosawzdaćomaj wustawki wohnjoweje wobory gmejny z komandowymaj městnomaj Hórki a Nuknica.

Zahajenje twara a kładźenja wodowoda a płunowoda we wjesnym dźělu Hórki. Financowanje bu přez přistup k změrowemu zwjazkej za pitnu wodu Kamjenc wot zwjazka njesene.

W awgusće kupi gmejna předawarnju, kotraž bu na komunalnej ležownosći twarjena. Kupne zrěčenje bu ze zarjadnikom nad zamóženjom Konsumoweho drustwa Wuchodna Sakska wotzamknjene.

Dźěći z wjesneho dźěla Hórki maja wot přichodneho šulskeho lěta do Chrósćic do šule chodźić.

W decembrje buchu młodźinskemu klubej přez spěchowanske srědki nakupjene hrajne nastroje a sportowe nastroje přepodate.

W decembrje bu wotpadkowa deponija saněrowana a nowa wobsadźena.

1993

Na nawsy bu pomnik wojaka wottwarjeny, zornowcowa plata kaž tež wojak sam dokładnje wurjedźenej a restawrowanej. K wobstejacej wopomnjenskej tafli Prěnjeje swětoweje wójny přińdźe hišće dalša za padłych wojakow Druheje swětoweje wójny k tomu. Tuta bu wot rězbarja Dünnbiera z Wulkeho Šunowa zhotowjena.

1994

W awgusće bu z dotwarjenjom centralneho zastaranje z pitnej wodu tež zastaranje z hašenskej wodu wo tójšto polěpšene. Šěsć podzemskich hydrantow zawěsća za cyłu wjes zastaranje z hašenskej wodu.

1996

Po gmejnskej statistice bydla w našej wsy ž150 ónske a 156 muske wosoby.

Z pomocu gmejny a sponsorow kaž tež čłonow sportoweje sekcije kehelowanje bu kehelowanišćo w běhu štyrjoch měsacow wobnowjene.

1997

W septembru buchu pjećdźesać metrow kanalizacije sporjedźanych a chódnik wobnowjeny.

W oktobrje bu fasada wjesneje nakupowanskeje hale ponowjena a sirena přetwarjena.

Busowe zastanišćo při Hłownej dróze bu ponowjene.

1999

W aprylu buchu wohnjowoborne wustawki gmejny Chrósćicy předźěłane. Z tym ma gmejna Chrósćicy tři wjesne wobory z městnymi wobornymi nawodami a jednoho gmejnskeho woborneho nawodu.

W tutym lěće su přez třista wobydlerjow zličili.

Kónc julija su ABM-mocy wokoło hašenskeho hata groćany płót natwarili. Z tym je jedne njezbožowe žórło wotstronjene a wjesny wobraz porjeńšeny.

Poslednja skała bu hišće wobhospodarjena a słuži dźensa z wulkej wodowej płoninu a wodowej hłubokosću jako idealna nurjenska wodźizna. Tuta wodźizna so wot tu zasydleneje nurjenskeje šule z Bamberga wobhospodarja.