1703

Prěnju nam znatu statistiku je farar Zynda z Chrósćic lětsa zestajił. Jeničce w Prawoćicach su domy, katolikojo a protestanća.

1800

Prawoćicy mějachu napadnje wšelake formy wjesneho mjena, mjez nimi tež přeněmčena forma.

1804

Wokoło 1804 so wjeska Brawozizny mjenuje.

1848

Wokoło 1848 so wjeska potom Prawocjźicźe mjenuje.

1871

W decembrje bu ludowe ličenje w serbskich wosadach přewjedźene.

Chrósćicy su najwjetša wosada, do njeje słušeja tež wsy lutherskeje wosady. We wsy Prawoćicy samej je to nimale połsta katolikow.

1884

W Prawoćicach přeměni Cyž na směr Chrósćicy šěsć kórcow lěsa na polo. To samsne činješe Wićaz ze štyrnaće kórcami lěsa do směra Baćonja a Křižank z dwěmaj kórcomaj do Nuknicy.

1909

Prawoćicy, Kopšin a Nuknica mějachu nahladny wobstatk koni – nimale połsta jich bě.

1912

Ličenje skotu přewjedźe so w Prawoćicach, Kopšinje a Nuknicy. Ličene buchu konje, howjada, swinje, kozy, pjerizna a kołće.

1930

Sobotu wječor wudyri w Hórbankec młynje woheń, kotryž bórze bróžnju do popjeła přeměni. Klóšterska wohnjowa wobora běše ze swojej motorowej sykawu jako prěnja na palnišću a dźěłaše z wulkim wuspěchom. Jim so poradźi, dom před zničenjom wuchować. Chróšćanska sykawa běše jako druha při městnje wohenja.

1947

W tutym lěće namakachu přesydlency ze Šleskeje a Němcy z Madźarskeje nowu domiznu w tutej wsy. Woni namakachu dźěło pola burow w Prawoćicach a Nuknicy a móžachu tak swoje swójby zežiwić.

Dźěći wopytachu Chróšćansku šulu a nawuknychu zdobom němsku a serbsku rěč.

1955

Přehlad wo nošerkach narodneje drasty: 13

• pod 24 lět: 1
• najmłódša nošerka narodneje drasty: 23
• najstarša nošerka narodneje drasty: 73

1974

Přez zjednoćenje wsow Hórki, Prawoćicy, Nuknica, Kopšin a Kozarcy do wulkogmejny Chrósćicy rozšěri so teritorij gmejny.

1987

W Prawoćicach ličachu 108 wobydlerjow. 

1990

Kónc apryla tutoho lěta bu z dźěłami na trafostaciji započate.

Wjesne wobswětlenje bu přez firmu Jakubaš we wšěch wjesnych dźělach do porjadka stajene.

1991

Wjazacy wodowód za zastaranje z pitnej wodu mjez Prawoćicami a Zejicami bu kładźeny, zo by so wobstajny ćišć we wjesnej syći docpěł.

We wjesnym dźělu Prawoćicy bu tohorunja ke kóncej lěta wjesne zastaranje z pitnej wodu zahajene. Paralelnje k wodowodej so płunowody w Chrósćicach a Prawoćicach přez firmu Čorny Halštrow kładu.

1993

W lěću je swójba Hórbankec swój rybjacy hat připrawiła, po tym zo bu tutón lěto do toho wot gmejny přizwoleny.

1996

Po gmejnskej statistice su w našej wjesce (z Kopšinom) 58 žónskich a 71 muskich wosobow žiwi.

Přez ponowjenje zepěrneje murje při dróze a kładźenje betonowych rołow móžeše so wjetši strach wotwobroćić (pola Handrija Brězana).

1997

Nawjes w našej wsy bu rozšěrjena a asfaltowana.

1999

Ze stodźesać wobydlerjemi su Prawoćicy relatiwnje mała wjeska, tu bydla 12 rentnarjo, 8 bjezdźěłni a 38 wobydlerjow maja hišće dźěło. Dale je tu 27 młodostnych a 22 dźěći žiwo.

W oktobrje móžeše so wotsypkowa deponija w Prawoćicach zrunać a z něhdźe šěsćstow młodymi dubami wobsadźeć.

2000

Přehlad wo nošerkach narodneje drasty: 3

• pod 24 lět: 0
• najmłódša nošerka narodneje drasty: 76
• najstarša nošerka narodneje drasty: 89

Po gmejnskej statistice su w našej wjesce 46 žónskich a 61 muskich wosobow žiwi.

2009

Nowa wuwěškowa tafla so nastaji.

Lipowa dróha so nowa kołmazuje a wotběžny žłob so nowy plestruje.