1350

Hižo w tutym lěće móžemy w zapisach młyn a wosom wjetšich burskich statokow namakać.

1692

Kozarcy pomjenowa wjes, w kotrejž wobsedźerjo kozow bydlachu, dokelž wjes we wunošnej wokolinje zboka na špatnišej pódźe ležeše.

1730

Prěnja statistika bu přez fararja Zyndu z Chrósćic nastajena.

1777

Po prěnim jednotnje nastajenym přepytowanju za tutón rum dawa w Kozarcach w tym času dwanaće twarjenjow.

1857

Na směr Kozarcy a Prawoćicy buchu slowčiny sadźane.

1871

W Kozarcach bydli 65 katolikow.

1877

W juliju kupi klóšter wot namrěwcow njeboh Pětra Nowaka jeho kubło w Kozarcach, přez čož tež cyły Nowakec hat na wustaw přińdźe. Klóšter kupi wot namrěwcow zemrěteho kubło w Kozarcach, wot kotrehož so hodźace kruchi w swojim wobsydstwje integrowaše, zbytk přenaja.

1929

Napohlad typisce serbskeho burskeho statoka je čěski moler Ludvik Kuba w Kozarcach molował. Z toho časa zhubichu so burske tykowane domy, zhibowane wrotowe wobłuki a twarjenja z wotewrjenej chódbu z wjesneho wobraza abo wone buchu přetwarjene.

1950

Nawjes bu z šoterom a pěskom wuporjedźena.

1950

Přehlad wo nošerkach narodneje drasty 1955 : 11

• pod 24 lět: 1
• najmłódša nošerka narodneje drasty: 20
• najstarša nošerka narodneje drasty: 70

1957

Kozarcy so do Chrósćic zagmejnuja.

1960

Hač do kónca pjećdźesatych lět wjedźeše Korla Pietsch posledni młyn w Kozarcach.

1962

Na poslednjej njedźeli w awgusće poswjeći knjez monsignore farar Jan Wjeńka wobnowjenu kapałku swójby Matkec. Wona bu wot wobsedźerja kubła Mikławša Henčla jako dźak za wusłyšenje na česć Praskeho Jězusdźěćatka natwarjena. Tuta kapałka bu kónc wójny jara wobškodźena, tak zo ju swójba Matkec wobnowić da, Jězusdźěćatko na wołtarju je knjez Pawoł Kmjeć z Chrósćic restawrował.

1964

Kozarčanske ratarske prodrustwo so z ratarskim prodrustwom "Domizna" w Chrósćicach zjednoći.

1968

Kónc šěsćdźesatych lět bu prěni zaryw za twar kupjele pod hołym njebjom na ležownosći Wudwor wuwjedźeny. Rozmołwy k twarej kupjele dawachu hižo wjele lět do toho.

1969

W tutym lěće natwarichu wobydlerjo wjetšu a swětlišu kapałku. Swjećatko Jězusdźěćatka Henčlec wowki je čestne městno dóstało.

1972

Spočatk sydomdźesatych lět dóńdźe při twarje kupjele k enormnym komplikacijam, samo k stagnaciji inwestobjekta. Po zjednoćenju małych gmejnow Hórki, Nuknica a Chrósćicy móžachu so twarske dźěła zaso zahajić.

1974

Přez zjednoćenje wsow Hórki, Prawoćicy, Nuknica, Kopšin a Kozarcy do wulkogmejny Chrósćicy rozšěri so teritorij gmejny.

1975

Wotewrjenje Kozarčanskeje kupjele: W kupjeli dawa hrajkanišćo, blidotenisowa plata, wulka šachowa hra a polo za volleyballowe hry.

1985

Wohnjowoborowy haty w Chrósćicach, Hórkach a Kozarcach so rekonstruhowachu abo nowo natwarichu za cyłkownje 70.000 hriwnow.

Tuchwilu bydli w Kozarcach štyrceći wobydlerjow.

1988

Z pomocu wobydlerjow wsy bu kiosk za zastaranje dźiwich za kupanjom modernizowany a rozšěrjeny.

1990

Za čas štyri měsacy trajaceje kupanskeje sezony přińdźe 26.000 wopytowarjow. Lěto do toho běchu to 54.000, snadna ličba wopytowarjow ma so na njepřihódne kupanske wjedro wróćo wjesć.

W tutym lěće bu wjesne wobswětlenje přez firmu Jakubaš we wšěch wjesnych dźělach do porjadka stajene.

1991

Twar wodowoda bu spočatk dźewjećdźesatych lět w Kozarcach započaty.

Spočatk awgusta bu naša kupjel po njewjedrje přez błotowu lawinu njewužiwajomna, tak zo dyrbješe so zawrěć. Dwaj dźěłaćerjej buštaj k wotstronjenju přirodneje katastrofy zasadźenaj.

1992

Planuje so, kupjel w přichodnym lěće kompletnje modernizować. Něhdźe sydom milionow hriwnow su za zwoprawdźenje projekta trěbne, kotrež buchu hižo přizwolene. Hdyž maja gmejny zajim na zwoprawdźenju tutoho projekta, budu so financielnje wobdźělić.

Gmejnske zastupnistwo wobzamkny na zakładźe komunalneho wustawoweho zakonja přistup k „Zaměrowemu zwjazkej Kozarčanska kupjel".

1993

Srjedź awgusta tutoho lěta zahaja so twarske dźěła w našej dožiwjenskej kupjeli w Kozarcach. Wobšěrne wotkrywanske dźěła w kupanskim wobłuku, saněrowanje wjacezaměroweho twarjenja a přetworjenje płuwanskich basenkow su planowane. Dale su twar filtroweho twarjenja a jeho techniskeho wuhotowanja kaž tež wuhotowanje ležownosće planowane.

1994

Srjedź julija so saněrowana wólnočasna kupjel w Kozarcach znowa wotewri.

1996

W nowembru budźe wosebite posedźenje zaměroweho zwjazka wo přez škleńčanu nić zesylnjenym kumštnym poćehnjenju w basenku za njepłuwarjow wuradźować. Přez škleńčanu nić zesylnjene kumštne poćehnjenje, kotrež žołmy mjeta, su prawidłownje reparatury trěbne.

Po statistice bydla tu 24 žónskich a 19 muskich wobydlerjow.

1997

Přepodaće wodočisćenskeje připrawy: Srjedź septembra bu w Kozarcach nowa wodočisćenska připrawa swjatočnje přepodata. Wona je druha připrawa wotpłóčkoweho zaměroweho zwjazka "Při Klóšterskej wodźe" a ma wulku kapacitu.

Wuznamne wolóženje přinjese nowa wodočisćenska připrawa, kotraž drje Kozarcy rěka, ale na Wudworskich honach leži. W nowej wodočisćenskej připrawje so wopłóčki w sydom technologiskich stopjenjach mechanisce a biologisce rjedźa.

K nowej wodočisćenskej připrawje słušeja wulki kulojty basenk a dwaj silaj za błoto

1998

Dokelž Chróšćanscy křižerjo prěni króć přez Worklecy a Kozarcy jěchaja, so puć mjez woběmaj wsomaj wušěri a sporjedźa.

1999

W tutym lěće ličachu 48 wobydlerjow.