Bože domy a kapałki w Chróšćanskej gmejnje su zwjetša hižo lětdźesatki abo samo lětstotki stare. W Nuknicy je tomu hinak. Tamniša kapałka bu hakle w lěće 2022 poswjećena. Patron kapałki je swjaty Antonius. Lěto pozdźišo potom poswjeći, tohorunja w přitomnosći mnohich wjesnjanow a hosći, farar Měrćin Deleńk tež nowu zwóńcu ze zwonom. Z tym nasta w Nuknicy mały centrum za nabožne zarjadowanja. Někotre lěta do poswjećenja su wjesnjenjo towarstwo „Nukničan kapałka z.t.“ załožili.  Wot gmejny kupichu staru gratownju wohnjoweje wobory wosrjedź wsy. Architekt Marko Dźisławk z Dobrošic njeje towarstwu jeničce přistupił, ale skutkuje aktiwnje na předewzaću sobu. Je wjacore namjety předpołožił, kak móhli gratownju přetwarić a kajka móhła kapałka wupadać. Na hłownej zhromadźiznje kónc septembra 2019 su so za jedyn z namjetow rozsudźili. Po nim wostachu zornowcowe murje stejo, třěcha so powjetši a před kapałku ma zwóńca stać. Na 2,80 m króć 3,40 m wulkej płoninje maja w nowej kapałce dźewjeć městnow k sedźenju. Kapałka je wšědnje přistupna. Kapałka w Nuknicy njeje jeničce zetkanišćo za zhromadne modlenje, ale wona je tež naslědnym generacijam wuraz swědčenja wěry we wsy.

Roman Nuk (předsyda)

Lěto załoženja: 2018

Ličba čłonow: 24

Dorfkapelle Nucknitz e. V.

IBAN: DE83 855 500 001 002 039 963

Darićeljo dóstanu, jeli sej to přeja, darićelske wobkrućenje.