Smy wulka zhromadnosć młodych a staršich młodostnych, staršich a starych wjesnjanow a jich dźěći z Nuknicy a wokolnych wsow.

Hłowny podawk našeho kluba je Jolka-swjedźeń, kotryž je přez hranicy Łužicy znaty. Tute wulke serbske zarjadowanje žada sej tójšto přihotow, z čimž hižo měsacy do toho započinamy. Kóžda pomocliwa ruka je prašana, tuž wobdźěla so tež wjesnjenjo wšitkich generacijow. Dotal běchu wšitke Jolka-swjedźenje  wuspěšne.

Na ležownosći našeho młodźinskeho kluba mamy beach-wolejbulowe polo, kotrež so w lěću rady wužiwa. Polěpšenja abo namjety za nowostki w młodźinskim klubje so na zhromadźiznach diskutuja a wobzamknu. Wjesny klub Nuknica ma rjanu wobnowjenu klubowu rumnosć, kotraž so přez wohnjowu woboru, za dźěćace póstnicy, hodowničku staršich z přednoškom, mejemjetanje a wjesny swjedźeń kaž tež za priwatne swjedźenje wjesnjanow a jich přećelow wužiwa.

Nuknica a wokolne wsy su žro serbskeho žiwjenja, hdźež so wšitke serbske tradicije pěstuja.